Најновата оставка со голем одек пристигна од Холандија, каде министерот за надворешни работи Каспар Велдкамп се повлече поради несогласувања околу санкциите кон Израел. Неговите предлози – кои вклучуваа забрана за увоз на производи од нелегални израелски населби, забрана за купување оружје од Израел, забрани за патување за екстремно десничарски израелски министри и признавање на палестинската државност – беа блокирани од коалициските партнери.
Оставката на Велдкамп предизвика серија повлекувања – центристичката партија Нов општествен договор (NSC) ги повлече сите свои министри и државни секретари од привремената влада. Премиерот Дик Схооф изрази жалење за кризата, нарекувајќи ја состојбата во Газа „драматична“ и откажа официјална посета на Украина за да се справи со внатрешните превирања.
Велика Британија: Внатрепартиски бунт во Лабуристичката партија
Во Велика Британија, неколку пратеници од Лабуристичката партија поднесоа оставки поради ставот на премиерот и лидер на партијата Кир Стармер, кој долго време избегнуваше да повика на итен прекин на огнот во Газа. Меѓу нив беа Имран Хусеин, Џес Филипс и Јасмин Куреши, кои јавно изјавија дека морале да постапат „според сопствената совест“ и во име на илјадници граѓани што барале поддршка за примирје.
Протести се проширија и на локално ниво, каде неколку советници, како и членови на младинското крило на партијата, се повлекоа во знак на несогласување со политиката на раководството.
Шпанија: Напуштање на коалицијата од страна на Подемос
Во Шпанија, петмина пратеници од левичарската партија Подемос ја напуштија коалициската влада, откако нивната лидерка Ионе Белара беше спречена да зборува за Палестина во парламентот. Подемос ја обвини израелската влада за планиран геноцид уште на почетокот на конфликтот, а партијата побара прекин на сите договори за вооружување со Израел и признавање на палестинската државност.
Ирска и Белгија: Зголемен притисок врз владите
Во Ирска, долгогодишниот претставник во Советот на Европа за борба против расизмот, Мајкл Фарел, поднесе оставка, обвинувајќи го телото за молчење за нападите врз Газа. Во Белгија, министерот за надворешни работи Максим Прево предупреди дека коалициската влада може да се соочи со колапс ако не заземе поостар став кон израелските кршења на човековите права.
Европските аналитичари предупредуваат дека овие оставки укажуваат на растечка политичка нестабилност во регионот, поттикната од долготрјаниот и разорен конфликт во Газа.
Извор: N1info.rs
