Американската поп ѕвезда Бритни Спирс ги продаде правата на својот музички каталог на издавачката компанија Primary Wave, пренесуваат американските медиуми. Иако деталите од договорот и точната сума не се објавени, оваа продажба се смета за значаен чекор во нејзината долга и влијателна кариера.
Бритни Спирс, која светска слава стекна кон крајот на 1990-тите со хитот „…Baby One More Time“, со години доминираше на поп сцената со песни како „Toxic“, „Oops!… I Did It Again“, „Gimme More“ и „Womanizer“. Нејзиниот музички каталог останува еден од најпрепознатливите во модерната поп музика.
Пејачката во 2024 година изјави дека нема намера да се врати во музичката индустрија, а нејзиното последно издание беше дуетот со Елтон Џон од 2022 година. Продажбата на каталогот доаѓа по турбулентен период во нејзиниот живот, вклучувајќи го и завршувањето на 13-годишното законско старателство во 2021 година.
Во последните години сличен потег направија и други светски ѕвезди, кои ги продадоа правата на своите музички дела, што го потврдува трендот на големи промени во музичката индустрија.
