Тринаесетгодишно британско момче почина откако било прободено со нож во својот дом во Португалија, во инцидент што полицијата го опишала како случај на семејно насилство. Според официјалните информации, осомничениот за нападот – поранешен партнер на мајката на детето – исто така починал на местото на настанот.
Инцидентот се случил во селото Казаис, во општината Томар, околу 145 километри североисточно од главниот град Лисабон. Португалските власти соопштија дека полицајци од GNR (Национална републиканска гарда) интервенирале по пријава за, како што наведуваат, „ситуација што укажува на семејно насилство“.
При пристигнувањето во домот, полицијата ја затекнала мајката на момчето со видливи знаци дека била врзана и физички нападната. Таа веднаш била пренесена во најблиската болница за укажување лекарска помош, соопштија надлежните.
Во официјалното полициско соопштение се наведува дека и детето и осомничениот имале повеќе повреди нанесени со ладно оружје. И покрај тоа што кај двајцата биле регистрирани витални знаци, лекарите набргу по интервенцијата ја констатирале смртта на лицата на самото место.
Полицијата дополнително информира дека во куќата се чувствувал силен мирис на гас, по што набргу дошло до експлозија. Во експлозијата бил повреден и еден припадник на GNR, кој учествувал во интервенцијата.
Според податоците на истражните органи, осомничениот во минатото веќе имал отслужено затворска казна за тешко убиство. Семејството, исто така, било евидентирано кај надлежните служби поради претходно пријавени случаи на семејно насилство во 2022 и 2023 година.
Од Британско Министерство за надворешни работи соопштија дека се во контакт со локалните власти во Португалија и дека се подготвени да обезбедат конзуларна поддршка за засегнатите лица. „Во контакт сме со локалните институции по инцидентот и стоиме на располагање за понатамошна помош“, наведоа од Министерството.
Истражните постапки се во тек, а португалските власти најавуваат дополнителни информации по завршување на увидот и форензичката анализа.
