Британското обвинителство во понеделник подигна обвинение за десет обиди за убиство против 32-годишниот Ентони Вилијамс, кој во саботата изврши масовен напад со нож во воз што патувал од Донкастер кон лондонската станица „Кингс Крос“.
Според информациите , Вилијамс нападнал патници во текот на патувањето, предизвикувајќи паника меѓу присутните. Возот бил итно запрен околу 18:25 часот по локално време на станицата во Хантингтон, каде што напаѓачот бил уапсен од полицијата.
Полицијата соопшти дека пет од вкупно десет повредени лица се пуштени од болница, додека едно лице, член на персоналот на железницата кој се обидел да го спречи нападот, се наоѓа во животно загрозувачка состојба.
Осомничениот е обвинет и за поседување нож и за уште еден претходен напад во источен Лондон, за кој се товари за обид за убиство. Тој ќе се појави пред судот во Питерборо во текот на понеделникот.
Истражителите наведуваат дека мотивот на нападот сè уште не е познат, но според првичните податоци нема индикации дека се работи за терористички чин. Сведоци изјавиле дека напаѓачот изгледал „дезориентирано и вознемирено“ непосредно пред инцидентот.
Инцидентот го потресе британското општество и повторно ја отвори темата за безбедноста во јавниот превоз и менталното здравје на сторителите на насилни дела.
