Центарот за управување со кризи информира дека поради најавени врнежи од дожд и снег не се очекуваат поголеми проблеми со поплави, но постои ризик од локални непогоди.
Поради очекуваниот силен ветер, можно е да се појават високи бранови на Охридското Езеро, каде водостојот веќе е на повисоко ниво.
Според проценките, поголемите реки ќе можат да ги примат врнежите без излевање надвор од речните корита.
Сепак, во случај на интензивни и поројни врнежи, можно е брзо зголемување на водостојот кај суводолиците и помалите реки со помали сливни подрачја.
Постои и ризик од локални проблеми во урбаните средини, особено во случај на невреме проследено со силен ветер и обилни врнежи.
Од ЦУК апелираат на внимателно движење, особено во близина на суводолиците и помалите реки, каде условите може брзо да се променат.
