Во Битола вечерва ќе биде отворено 46. издание на Интернационалниот фестивал на филмска камера „Браќа Манаки“.
Свеченото отворање е закажано во 20 часот во Центарот за култура – Битола, со проекција на филмот „Мајка“ на режисерката Теона Стругар Митевска. Директор на фотографија е Виржини Сен-Мартан од Белгија, сценографијата е на Вук Митевски, а прв асистент на режија е Јане Ќортошев. Во главните улоги настапуваат светски познатите актерки Нуми Рапас и Силвија Хукс, заедно со Никола Ристановски, Лабина Митевска и други.
Идејата за филмот се развивала повеќе од една деценија, кога сестрите Теона и Лабина Митевски работеле на документарецот „Тереза и јас“. Оттогаш започнала соработката со писателот Гоце Смилевски, кој го потпишува сценариото за „Мајка“ заедно со Теона Митевска и *Елма Татарагиќ.
Филмот е инспириран од животот на Мајка Тереза, особено од нејзината внатрешна борба да ја оствари својата визија и хумана мисија.
„Мајка“ е копродукција меѓу Македонија, Белгија, Шведска, Данска и Босна и Херцеговина. Поддржан е од Агенцијата за филм на Македонија, Креативна Европа – МЕДИА, Данскиот филмски институт, Belgium Tax Shelter, Белгиската национална и регионална филмска поддршка, Белгиската национална телевизија, Шведскиот филмски фонд, шведски регионални фондови и Филмскиот фонд од Сараево.
Во Битола веќе пристигнаа првите гости, црвениот килим е поставен пред Центарот за култура, а градот го добива сјајот на фестивалот во чест на браќата Манаки.
