Поранешниот принц Ендру Маунтбетен-Виндзор, е уапсен под сомнение за злоупотреба на јавна должност, објави британската полиција.
Полицијата соопшти дека Ендру се наоѓа во притвор, а се вршат претреси на неговите имоти во грофовиите Беркшир и Норфолк. Фотографии од утринава покажуваат возила кои пристигнуваат на имотот Сандрингхам во Норфолк, пренесува BBC.
Уапсен е по пријава за наводно споделување доверливи материјали со покојниот повеќекратен сексуален престапник Џефри Епстајн. Ендру, кој денес има 66 години, повеќепати јавно ги негираше сите обвинувања за недолично однесување.
„Во рамки на истрагата, денес (19.02.) уапсивме маж во шеесеттите години од Норфолк по сомнение за злоупотреба на јавна должност. Се вршат претреси на адреси во Беркшир и Норфолк. Мажот се наоѓа во притвор. Не го именуваме уапсениот, согласно националните упатства, а истрагата е активна, па апелираме за внимателно известување за да се избегне непочитување на судот“, соопшти полицијата
Помошникот на шефот на полицијата, Оливер Рајт, додаде: „По темелна проценка, започнавме истрага за наводната злоупотреба. Важно е да се заштити интегритетот на истрагата додека, во соработка со партнери, го истражуваме наводното кривично дело. Сведоци сме на големиот интерес на јавноста и ќе обезбедиме дополнителни информации во соодветен момент.“
Се очекуваат понатамошни детали за случајот.
Извор: Index.hr
