„Брод за кукли“ е приказна за една или за сите женски судбини, или за сите човечки судбини – како една жена го доживува својот живот како серија за неостварени бајки. Претставата во седум заплети и седум различни амбиенти се однесува на седумте инкарнации на хероината и седумте метаморфози на нејзиниот пасивен женски принцип.
Во битолската претстава играат Сандра Грибовска – Илиевска, Викторија Степановска – Јанкуловска, Илина Чоревска, Катерина Аневска – Дранговска, Валентина Грамосли, Петар Спировски, Мартин Мирчевски, Никола Пројчевски, Марјан Георгиевски, Филип Мирчевски, Живко Борисовски, Огнен Дранговски, Петар Горко и Никола Стефанов.
Сандра Грибовска Илиевска ја освои престижната награда за најдобра млада актерка на 69-тото Стериино позорје во Нови Сад, Србија, за нејзината изведба во улогата на малата сестра.
Претставата во која таа се истакнува носи препознатлив македонски уметнички печат. Преводот и драматуршката обработка се дело на Билјана Крајчевска, а сценографијата е замислена и реализирана од Валентин Светозарев. За костимите се погрижи Александра Пециќ – Младеновиќ, додека музиката е компонирана од Димитар Андоновски. Кореографските елементи ги изработи Андреа Кулешевиќ.
На техничкиот аспект на изведбата посветено работеле и тон-мајсторот Александар Димовски и светло-мајсторот Игор Мицевски, а видео проекциите, кои значително ја збогатуваат атмосферата на претставата, се дело на Владимир Переловски и Филип Ошавков.
