Биткоинот ја завршува првата трговска недела во 2026 година со стабилизирана цена околу 90.000 долари, што претставува пад од околу 2 проценти во споредба со истиот период лани.
Најпознатата криптовалута не успеа да ја пробие клучната граница од 95.000 долари, останувајќи под нивото кое уште од големата распродажба во октомври се покажува како ценовен „плафон“. Иако на почетокот на неделата беше забележан краткотраен опоравок, денес цената изнесуваше околу 90.200 долари.
Чекање на клучни одлуки
Пазарот се наоѓа во состојба на исчекување, додека инвеститорите внимателно ги следат политичките одлуки во Вашингтон, поврзани со царините, раководството на американската централна банка (ФЕД) и регулацијата на криптовалутите.
Според Џејк Островскис, раководител на вонберзанско тргување во компанијата Wintermute, дополнителна несигурност донела и одложената одлука на Врховниот суд за царините, што заедно со приливите во ETF-фондовите и геополитичката неизвесност придонело за моменталната стагнација на пазарот.
„Гледаме класична консолидација по растот, по силниот почеток на биткоинот во 2026 година“, изјави Островскис.
Воедно, економските податоци подобри од очекуваното ги намалија шансите за дополнително намалување на каматните стапки, што го ограничи замавот на биткоинот кон неговиот историски максимум од над 126.000 долари, забележан во октомври.
„Макроекономските показатели генерално беа посилни од очекувањата, што умерено ја намали веројатноста за намалување на каматите во март и веројатно додаде краткорочен притисок врз цените“, изјави Џејмс Батерфил, раководител на истражување во CoinShares.
Стагнација како знак на стабилизација?
Сепак, дел од аналитичарите актуелната стагнација ја гледаат како позитивен сигнал. Брајан Витен, висок аналитичар во Siebert Financial, смета дека станува збор за здрава консолидација по период на засилена продажба.
„Биткоинот се консолидира околу 90.000 долари по продолжената распродажба поврзана со даночна оптимизација на загубите и стравувањата дека MSCI би можел да ги исклучи компаниите со дигитална актива од главните индекси“, изјави Витен.
Тој додава дека, откако овој ризик е надминат, притисокот од продажба во голема мера е исцрпен.
Дополнителен оптимизам донесе и веста дека MSCI се откажал од планот за отстранување на ризниците со дигитална актива од своите индекси, оценувајќи дека тие се однесуваат слично на инвестициски фондови.
Долгорочниот оптимизам останува
И покрај моменталното затишје, голем дел од трговците остануваат оптимисти во однос на долгорочните изгледи на биткоинот. Батерфил предвидува дека цената до крајот на годината би можела да достигне дури и 200.000 долари.
Островскис се согласува дека пробивот на клучната психолошка граница повторно би поттикнал силна куповна активност и би го отворил патот кон шестцифрени вредности.
„Траен пробив над 95.000 долари најверојатно би имал рефлексивен ефект врз пазарот“, заклучува тој.
