Зголемувањето на цената дојде по усвојувањето на нови регулативи за криптовалути во американскиот Сенат, што предизвика поширок раст на крипто пазарот и поттикна оптимизам кај инвеститорите.
Цената на биткоинот се зголеми за повеќе од 4% и достигна околу 109.700 долари во среда попладне, надминувајќи го претходниот рекорд од 109.228 долари поставен на 20 јануари.
И другите криптовалути забележаа раст во последните 24 часа: Ethereum се зголеми за 3,2%, XRP за 2,4%, Solana за 3,3%, а meme токенот Dogecoin за 2,7%.
Законот што ја зголеми цената
Биткоинот, кој на почетокот на мај вредеше нешто помалку од 96.500 долари, бележеше континуиран раст заедно со другите криптовалути во очекување на одлуката на Сенатот за Законот GENIUS, кој беше усвоен во понеделник. Иако сите демократи претходно гласаа против, законот помина со 66 гласа „за“ и 32 „против“, при што 16 демократи и двајца републиканци се спротивставија.
Законот воведува прва сеопфатна регулаторна рамка за стабилни монети — криптовалути врзани за валути како американскиот долар — со нови механизми за заштита на потрошувачите и ограничувања за компаниите што ги издаваат.
Како резултат на зголемениот интерес и доверба, вкупната пазарна вредност на глобалниот крипто пазар се зголеми за околу 111 милијарди долари во последните 24 часа, од 3,43 трилиони на 3,54 трилиони долари, според CoinGecko.
Што предвидува GENIUS законот
Законот GENIUS, воведен во февруари од сенаторот Бил Хејгери, републиканец од Тенеси, предвидува нови ограничувања за издавачите на стабилни монети. Компаниите ќе мора да одржуваат резерви на средства што ќе ја поддржуваат вредноста на валутата, што треба да ги заштити потрошувачите и да спречи колапс на стабилните монети при евентуална голема пазарна распродажба.
Дополнително, законот налага приоритетно исплаќање на сопствениците на токени во случај на банкрот на компанијата, а содржи и одредби за усогласување со прописите за спречување на перење пари и финансирање тероризам.
Политички контроверзии
Законот доаѓа во сенка на политички контроверзии. Демократите изразија сомнежи за потенцијални судири на интереси помеѓу претседателот Трамп и крипто-индустријата, особено поради врската со World Liberty Financial (WLF) — крипто фирма поддржана од Трамп, која го лансираше стабилниот токен USD1. Владата на Абу Даби наводно вложила 2 милијарди долари преку оваа криптовалута во берзата Binance.
Конгресменот Џералд Коноли и други демократи побараа од Министерството за финансии документи за оваа инвестиција, како дел од поширока истрага за WLF и мем-токените поврзани со Трамп, со сомнежи за поткуп, корупција и скриени донации.
Според демократите, мем-токенот $TRUMP би можел да биде искористен од „лоши актери“ за тајно влијание врз Трамп, особено откако Комисијата за хартии од вредност (SEC) во февруари исклучи ваквите токени од повеќето регулативи.
Сенаторката Елизабет Ворен остро го критикуваше законот, велејќи дека оригиналниот текст „дополнително ќе ја засили корупцијата на Трамп“. Од друга страна, сенаторот Хејгери законот го оцени како „чекор кон зацврстување на американското лидерство во областа на дигиталните средства и заштита на доларот за идните генерации“.
Извор: N1info.rs
