Според истражување на Германската метеоролошка служба (DWD), речиси половина од жителите на Германија (46%) се сметаат себеси за метеоропати. Затоа, покрај класичните временски прогнози, сè почесто се среќаваат и биометеоролошки извештаи.
Но, различните извори често даваат сосема различни прогнози и симптоми. DWD се фокусира на астма, ревма, кардиоваскуларни проблеми и општи тегоби, додека сајтови како Donnerwetter.de ги поврзуваат временските услови и со воспаление на слепо црево или дури и со неврози.
Чувствителност на време или метеоропатија?
Според Катрин Грао, биометеоролог од DWD, важно е да се разликува чувствителноста на време од метеоропатијата.
- Чувствителни на време се лица кои имаат дијагностицирана болест што е научно потврдена како зависна од временски услови (на пр. срцеви заболувања, астма, алергии).
- Метеоропатите, пак, пријавуваат општи симптоми како замор, главоболка или малаксаност, кои често не се научно потврдени.
Некои истражувања потврдуваат врска помеѓу времето и здравјето, но други не. Причината е што студиите честопати ги разгледуваат поединечно факторите како температура, притисок или влажност, а влијание имаат и личното здравје, стресот, исхраната и хормоните.
Дали треба да ги следиме биометеоролошките прогнози?
Грао советува: не секој треба редовно да ги следи биометеоролошките прогнози, бидејќи тие не важат еднакво за сите. Кај некои луѓе, самото читање на прогноза може да предизвика психолошки ефект и симптоми што инаку не би се појавиле.
За оние кои се навистина чувствителни на време, проверените прогнози можат да помогнат во планирање на активности и избегнување дополнителен стрес.
Ако некој се чувствува полошо при промени во времето, може свесно да го тренира телото за адаптација, преку физичка активност, здрав сон, добра исхрана и наизменично туширање со топла и ладна вода.
Топлината како здравствен ризик
Топлотните бранови не се метеоропатија, туку директна здравствена закана, особено поради климатските промени, вели д-р Јулија Шојерер од Клиничкиот центар LMU во Минхен.
- Пораст на итни случаи
- Повеќе хоспитализации
- Поголем број на починати, особено кај постари лица
Високите температури влијаат и врз бременост и тежината на новороденчињата. Зголемена е и алергиската реакција на полен, како и проблемите со дишење поради загадување на воздухот.
Совет: избегнувајте изложување на топлина, ладете го просторот, прилагодете ја активноста и пијте доволно течности. За хронични болни, препорачано е претходно да се консултираат со лекар за прилагодување на терапијата.
Како настануваат биометеоролошките прогнози?
Сајтовите како wetter.com користат метеоролошки податоци (температура, притисок, влажност, УВ зрачење, полен) и медицински знаења, додека DWD изработува дневни регионални прогнози врз основа на студии и модели проверени од биометеоролози.
Donnerwetter.de се потпира на историја на биометеоролошка литература и анализи преку Google Trends.
