Потврдениот број руски војници кои загинале во борбите во Украина или починале од последици на ранувања надмина 200.000, објави истражувачката група Mediazona во соработка со рускиот сервис на BBC News. Според извештајот, реалниот број на жртви веројатно е значително повисок и може да биде и двојно поголем, пренесува Kyiv Post.
Истражувачите, заедно со волонтери од Русија и од странство, ја потврдиле секоја жртва по име, користејќи поединечни посмртници, цивилни изводи од матични книги, геолоцирани гробови, списоци на единици, објави на социјални мрежи, известувања за погреби и евиденции од гробишта. Клучен пробив во истрагата било протекување на доверливи владини податоци за безбедносни проверки на околу 23.000 лица за кои полициските истражители утврдиле дека се мртви.
До среда напладне, вкупниот број потврдени руски жртви изнесувал 200.186. Во извештајот се нагласува дека оваа бројка претставува „конзервативна долна граница, а не конечна бројка“.
Загуби низ цела Русија
Мапирањето покажува дека загинатите доаѓаат од 26.600 градови, населби и села низ сите единаесет временски зони на Русија. Без исклучок, секој руски град примил посмртни останки на војници загинати во Украина.
Меѓу идентификуваните жртви се Алексеј Жарков (35) од арктичкото село Синдаско, најсеверната населба во Русија, како и Рустам Рустамов (24) од Дагестан, најјужната точка на земјата. Во најзападниот руски град, во Калининградската област, се потврдени 63 смртни случаи, најмногу од 336. бригада на морнаричката пешадија.
Најпогодени региони
Според извештајот, најголем товар од војната, прилагодено на бројот на жители, носат сиромашните региони со висок број доброволци. Најтешко погодени се јужносибирските региони долж границата со Монголија и Кина: Тува (476 загинати на 100.000 жители), Бурјатија (400), Забјакалскиот крај (362) и Алтајската Република (316).
Селото Чикој во Бурјатија, со само 525 жители, изгубило 10 мажи во војната – бројка што го прави едно од најтешко погодените населени места во Русија. Во извештајот се наведува дека „воената машина во голема мера се потпира на мажи од економски депресивни региони, каде што финансиските стимулации од воените договори претставуваат ретка, иако потенцијално смртоносна, шанса“.
Други проценки и официјални ставови
Западните воени проценки ги ставаат вкупните загуби на Кремљ во Украина на околу 1,2 милиони луѓе, од кои меѓу 300.000 и 500.000 се загинати, а останатите се ранети кои веројатно нема да се вратат во служба.
Руската влада последен пат објави официјални податоци во септември 2022 година, кога соопшти дека загинале 5.937 руски војници и дека воените операции „успешно напредуваат“.
Од друга страна, државната агенција TASS повторно го изнесе официјалниот став на Руската Федерација дека Украина претрпела повеќе од еден милион загинати војници од почетокот на инвазијата во февруари 2022 година, како и илјадници уништени тенкови и стотици воени авиони – бројки што значително се разликуваат од независните проценки.
Извор: BBC News
