Просечната цена на галон бензин во Соединетите Американски Држави нагло се зголеми, откако ескалацијата на конфликтот на Блискиот Исток предизвика сериозни нарушувања во снабдувањето со нафта.
Според податоците на Американската автомобилска асоцијација (AAA), еден галон (околу 3,78 литри) обичен бензин се продавал за 3,11 долари, што претставува пораст од 11 центи преку ноќ. Овој ненадеен скок ги изненади дел од возачите на бензинските пумпи низ земјата.
Цените на суровата нафта почнаа нагло да растат по нападите на САД и Израел врз Иран, на што Техеран возврати со серија напади врз повеќе земји во регионот. Ескалацијата дополнително ја влоши состојбата откако Иран изврши напади врз енергетски постројки во Катар и Саудиска Арабија, како и напад со дрон врз американската амбасада во Саудиска Арабија.
Дополнително, беше нарушен танкерскиот сообраќај низ Ормускиот Теснец – клучна поморска рута низ која минува околу една петтина од светската трговија со нафта. Овој фактор силно влијаеше врз глобалниот пазар.
Референтната американска нафта поскапе за 8,6 проценти и достигна цена од 77,36 долари по барел (околу 159 литри), што е највисоко ниво во последната година. Истовремено, цената на „брент“ нафтата, која претставува меѓународен стандард, порасна за 6,7 проценти и изнесува 81,29 долари по барел.
Покачувањата не се ограничени само на САД. Во Франција, особено во предградијата на Париз, беа забележани долги редици возила на бензинските пумпи, додека возачите брзаа да наполнат гориво стравувајќи од дополнителни поскапувања.
Експертите предупредуваат дека доколку тензиите продолжат, цените на горивата би можеле дополнително да растат и во наредните денови.
