Река луѓе од Нови Белград кон центарот
Во Белград, од Нови Белград и Земун кон центарот на градот се движеше долга и мирна колона граѓани, симболично наречена „река на отпорот“.
Движењето започна по Булеварот Михајло Пупин, каде беа забележани семејства со деца, пензионери, активисти, но и лица кои излегоа по првпат на протест.
„Излеговме бидејќи ни е доста. Не можеме да дозволиме да се тепаат деца и да се апсат професори како криминалци“, изјави една постара госпоѓа која носеше транспарент со натпис „Ќе нè има сè додека не нè слушнете“.
Протести пред Правниот факултет – пристигнаа и мотоциклисти
Пред Правниот факултет вечерва се одржа централен протест, каде први пристигнаа мотоциклисти, кои со сирени и транспаренти ја започнаа блокадата. Граѓаните се собираа со часови, а поддршката пристигна и од академската заедница.
Ректорот: Автономијата на Универзитетот мора да биде заштитена
„Синоќа на ова место, студентите беа изложени на тешки удари од страна на припадниците на јавниот ред и мир. Тие удари беа тешки не само за студентите, туку и за нивните пријатели, колеги, родители и за нас, професорите. Ударите беа насочени против Универзитетот и академската заедница, токму овде – на прагот на Правниот факултет. Ги осудуваме тие постапки. Автономијата на Универзитетот мора да биде заштитена. Ова не беше само удар врз автономијата на Универзитетот, туку и врз животите на оние што беа присутни овде. Бараме од припадниците на јавната власт да се воздржат од брутални напади врз студентите и граѓаните на нашата земја“, изјави ректорот Ѓокиќ на блокадата пред Правниот факултет во Белград.
Ниш и Нови Сад – истовремени блокади и пораки за солидарност
Во Ниш, главниот кружен тек беше блокиран, со најави дека ќе остане затворен до 23:30 часот. Граѓаните се движеа по пешачките премини, а полицијата постави неколку „марици“ во околината, пренасочувајќи сообраќај.
Нови Сад беше домаќин на протестна прошетка од кампусот, каде студентите туркаа контејнери со пораки против владејачката партија. Посебно внимание предизвика говорот на колеги на студентката Ана, на која неодамна ѝ беше скршена вилицата од страна на насилници поврзани со СНС. „За Ана нема помилување. Нејзината болка е реална, а насилниците се слободни. Ова не е правда“, порачаа студентите.
Реакции од меѓународната заедница
Комесарката за проширување на ЕУ, Марта Кос, изрази загриженост поради вестите за прекумерна употреба на сила:
„Внимателно ги следиме извештаите од Србија. Мирното собирање и изразувањето на мислење се основни човекови права. Ги осудуваме сите акти на насилство и бараме почитување на демократските вредности.“
Извор: Nova.rs
