Белгиски војник кој учествувал во НАТО-мисијата во Литванија починал од последици на повредите здобиени за време на воена вежба, соопштија белгиските одбранбени власти. Според првичните информации, војникот бил тешко повреден во петокот за време на обука со минофрлачко оружје и починал еден ден подоцна во болница.
Белгискиот министер за одбрана Тео Франкен и началникот на Генералштабот Фредерик Вансина во заедничко соопштение наведоа дека станува збор за „трагичен инцидент“ кој се случил во рамки на редовните активности на контингентот распоредeн во Литванија. Франкен на платформата X напиша дека е „длабоко потресен“ и изрази „солидарност и сочувство“ до семејството и колегите на загинатиот војник.
Сочувство упати и литванскиот претседател Гитанас Науседа, нагласувајќи дека белгискиот контингент „има непроценлив придонес за безбедноста на државата и целиот Алијанс“. „Нивната посветеност и жртва никогаш нема да бидат заборавени“, порача Науседа.
Белгиското федерално обвинителство отвори истрага за да се утврдат причините и условите под кои дошло до несреќата. Според агенцијата Белга, локацијата ја посетиле федерален судија и двајца детективи специјализирани за воени истраги. Паралелно, сопствена постапка отвори и белгиското Министерство за одбрана.
Загинатиот бил припадник на артилерискиот баталјон од Брасхат, дел од белгискиот контингент од околу 200 војници распоредени во Литванија во рамките на НАТО-мисијата „Предни копнени сили“ – мрежа од мултинационални борбени групи позиционирани во осум држави од источниот дел на Алијансата.
Литванија, потсетуваат анализите, се граничи со руската ексклава Калининград, што ја прави една од најстратешките точки за НАТО во регионот.
