Белата куќа во средата соопшти дека започнала мултимилионски сајбер натпревар за поттикнување на употребата на вештачка интелигенција (ВИ) за да се пронајдат и поправат безбедносните пропусти во инфраструктурата на американската влада, во услови на зголемена употреба на технологијата од хакери за злонамерни цели.
„Сајбер безбедноста е трка меѓу нападот и одбраната“, рече Ен Нојбергер, заменик советничка за национална безбедност на американската влада за сајбер и технологија во развој.
„Знаеме дека злонамерните актери веќе користат вештачка интелигенција за да го забрзаат идентификувањето на пропустите или да изградат злонамерен софтвер“, додаде таа во изјавата за Ројтерс.
Бројни американски организации, од здравствени групи до производствени фирми и владини институции, беа цел на хакерски напади изминативе години, а официјалните лица предупредуваат на идни закани, особено од странски противници.
Коментарите на Нојбергер за вештачката интелигенција се во иста насока со тие на шефот за сајбер безбедност на Канада, Семи Кури. Тој рече дека неговата агенција видела дека вештачката интелигенција се користи за сè, од создавање е-пошта за фишинг и пишување злонамерен компјутерски код до ширење дезинформации.
Двегодишниот натпревар вклучува награди од околу 20 милиони долари и ќе го води Агенцијата за напредни истражувачки проекти за одбрана (DARPA) – американското владино тело задолжено за создавање технологии за национална безбедност – соопшти Белата куќа.
Alphabet, Anthropic, Microsoft, и OpenAI – американските технолошки фирми во првите редови на револуцијата на вештачката интелигенција – ќе ги направат своите системи достапни за предизвикот, соопшти владата.
Натпреварот сигнализира официјални обиди за справување со заканата што се појавува, која експертите сè уште се обидуваат целосно да ја сфатат. Во изминатата година, американските фирми лансираа низа генеративни алатки за вештачка интелигенција, како што е ChatGPT, кои им овозможуваат на корисниците да создаваат убедливи видеа, слики, текстови и компјутерски код. Кинеските компании лансираа слични модели.
Експертите велат дека таквите алатки би можеле да го олеснат, на пример, спроведувањето масовни хакерски кампањи или создавање лажни профили на социјалните медиуми за ширење лажни информации и пропаганда.
„Нашата цел со предизвикот DARPA AI е да катализираме поголема заедница на сајбер бранители кои ги користат моделите на вештачка интелигенција за да ја зајакнат нашата сајбер одбрана“, рече Нојбергер.
Фондацијата за безбедност со отворен код (OpenSSF), американска група експерти кои се обидуваат да ја подобрат безбедноста на софтверот со отворен код, ќе биде задолжена да обезбеди „победничкиот софтверски код да се користи веднаш“, соопшти американската влада.
Извор: Reuters
