Bank of America се согласи да исплати 72,5 милиони долари на жртвите на Џефри Епстин, кои тврдат дека банката овозможила негови злосторства и профитирала од нив.
Тужбата, поднесена минатата година, наведува дека втората најголема банка во САД обезбедувала банкарски услуги за Епстин и неговата мрежа, како и сметки кои ги користеле жртвите и неговите соработници, меѓу кои и Гислајн Максвел и Леон Блек, поранешен извршен директор на Apollo Global Management.
Судијата на американскиот окружен суд Џед Ракоф, кој го води случајот, ќе одржи расправа во април за да одлучи дали ќе ја одобри нагодбата. Договорот не вклучува признавање на вина од страна на банката.
Позиција на банката
„Иако стоиме зад нашите претходни изјави во овој процес, вклучително и тврдењето дека Bank of America не овозможила сексуална експлоатација, оваа нагодба ни овозможува да ја затвориме оваа тема и да ставиме крај на поглавјето“, изјави портпарол на банката за NBC News.
Нагодбата ги опфаќа сите жени „кои биле сексуално злоупотребени или жртви на трговија со луѓе од страна на Џефри Епстин или лица поврзани со него“, во периодот од 30 јуни 2008 до 6 јули 2019 година. Според адвокатите, станува збор за најмалку 60 жртви.
Тужителките тврдат дека банката не ги надгледувала соодветно сметките и не пријавувала сомнителни трансакции навреме, вклучително и префрлања на пари од Леон Блек кон Епстин.
Слични тужби против JPMorgan Chase и Deutsche Bank исто така беа решени со нагодби во вредност од стотици милиони долари. JPMorgan плати 290 милиони долари, додека Deutsche Bank исплати 75 милиони долари на жртвите.
