Обилен снег парализира повеќе градови во регионот. Во делови на Босна и Херцеговина и Хрватска врнежите предизвикаа големи проблеми во сообраќајот, прекин на патишта и заглавени возила.
Според регионалните јавни сервиси, снежната стихија предизвика сериозни тешкотии во Сараево, Кнежево, Ријека и околните места, а во некои делови висината на снежниот покривач достигна над половина метар.
Сараево во колапс, Кнежево под половина метар снег
Сараево вчера доживеа целосен сообраќаен хаос. Снежни непроодни улици и обилните врнежи ги блокираа главните сообраќајници.
Во Кнежево, снежниот покривач надмина 50 сантиметри, а обилните врнежи целосно го успорија сообраќајот и го отежнаа движењето во повисоките делови на градот.
И во Нови Град ситуацијата е слична – улиците се под снег, а сообраќајот е отежнат.
Патишта блокирани – камиони заглавени кај Трново
Магистралниот пат Источно Сараево – Фоча со часови беше во прекин. Неколку камиони се заглавиле и го блокирале преминот пред Трново, што предизвика километарски колони и повеќечасовни доцнења.
На патот преку Романија, и покрај интензивниот снег, возилата се движат без поголеми проблеми, но со намалена брзина.
Бања Лука без струја – снежната линија достигна 20 сантиметри
Зимските служби во Бања Лука интервенираат во повисоките делови на градот, каде наврнаа над 20 сантиметри снег.
Неколку околни села и населби останаа без електрична енергија поради паднати кабли и дефекти предизвикани од снегот.
Федералниот хидрометеоролошки завод најавува дека снежните врнежи ќе продолжат и во текот на вечерните часови, како и појава на суснежница во поголем дел од земјата.
Црвен аларм во Ријека – и Хрватска под дебел снег
Според хрватските медиуми, снежната бура зафати голем дел од земјата. Во некои области висината на снежниот покривач надмина 30 сантиметри, а повеќе автомобили се завеани на патиштата.
Околу Ријека, Сплит и Клис сообраќајот е значително отежнат, а локалните служби апелираат на воздржаност од непотребни патувања.
Снег паѓа во: Лика, Горски Котар, Централна и северозападна Хрватска, Славонија и Далматинска Загора
Во некои делови е воведено ограничено движење на возила без зимска опрема.
Снег и на северот на Црна Гора – патиштата лизгави, магла ја намалува видливоста
Вечерва снег паѓа и на северот на Црна Гора. Поради поledица, сообраќајот на повеќе делници е значително отежнат.
Маглата дополнително ги усложнува условите за возење, а делови од автопатот се под тенок слој снег, јавува РТЦГ.
