Првите четвртфинални натпревари во Лигата на шампионите донесоа тесни, но значајни победи за Баерн Минхен и Арсенал, кои направија чекор напред кон полуфиналето.
Баерн Минхен оствари голема победа на гостувањето кај Реал Мадрид, славејќи со 2:1 на „Сантијаго Бернабеу“ и обезбедувајќи си подобра позиција пред реваншот во Германија.
Германскиот тим го отвори резултатот во првото полувреме преку Луис Дијас, а веднаш по паузата Хари Кејн зголеми на 2:0. Реал Мадрид успеа да намали преку Килијан Мбапе во 74. минута, но не и да избегне пораз пред домашната публика.
Покрај ефикасноста во нападот, клучна улога за Баерн имаше и голманот Мануел Нојер, кој со неколку значајни интервенции спречи израмнување и го задржа резултатот во корист на својот тим.
Во Лисабон, Арсенал потешко од очекуваното стигна до победа против Спортинг. Натпреварот долго време беше изедначен, со шанси на двете страни, но без реализација.
Решението го донесе Кај Хаверц, кој како резерва влезе во игра и во судиското продолжение постигна гол за 1:0, носејќи му на Арсенал важна предност пред реваншот на „Емирати“.
Голема заслуга за резултатот има и голманот Давид Раја, кој со неколку интервенции го одржа Арсенал во игра во моментите кога Спортинг беше поблиску до водство.
Со овие резултати, Баерн и Арсенал ќе ги дочекаат реваншите со минимална, но значајна предност. Реал Мадрид и Спортинг остануваат во игра, но ќе мора да бркаат негатива доколку сакаат пласман во полуфиналето.
