Австрија од следната година планира да воведе забрана за носење шамии во училиштата за девојчиња помлади од 14 години, соопшти денеска министерката за интеграција Клаудија Плаколм.
Предлог-законот, кој наскоро ќе се најде на расправа во Парламентот, треба да стапи во сила со почетокот на учебната 2026/2027 година. Плаколм, членка на централно-десничарската Австриска народна партија (ОВП), нагласи дека шамијата не претставува верски ритуал, туку, како што рече, го поттикнува развојот на „чувства на срам“, што може да доведе до „искажена нарушена слика за телото“ и „нестабилна самодоверба“ кај младите девојчиња.
Во 2019 година највисокиот австриски суд ја поништи претходната иницијатива на тогашната ОВП-владина коалиција за воведување ваква забрана.
Сепак, актуелната влада составена од ОВП, Социјалдемократската партија и либералната НЕОС смета дека овој пат предлогот ќе добие доволна поддршка. Како аргумент го наведуваат зголемувањето на бројот на муслимански девојчиња под 14 години во училиштата — од 3.000 во 2019 година на 12.000 денес.
Според предлог-законот, ако девојче носи шамија на училиште и покрај забраната, наставниците најпрво ќе треба да разговараат со родителите. Во случај на повторени прекршувања, родителите може да добијат парична казна до 800 евра.
Исламската заедница во Австрија остро ја критикува мерката, обвинувајќи ја владината коалиција дека сака да собира политички поени наместо да работи во интерес на децата. „Целта е да се профитира од антиисламското расположение“, порачаа од заедницата.
