Приватен авион со осум лица се урнал при полетување од аеродромот во Бангор, во американската сојузна држава Мејн, потврди Федералната управа за авијација (FAA). Леталото, деловен авион Bombardier Challenger 650, завршило превртено наопаку на пистата, а засега не е познат степенот на повредите на патниците и екипажот.
Несреќата се случила за време на снежна бура
Инцидентот се случил околу 19:45 часот по локално време, во услови на силна зимска бура која го зафати североистокот на САД. Температурите во Мејн биле значително под нулата, а слабиот, но постојан снег предизвикал многу слаба видливост.
Од аеродромот во Бангор соопштија дека итните служби веднаш реагирале, а на локацијата бил воспоставен центар за итни операции. Аеродромот бил целосно затворен во текот на ноќта од недела кон понеделник.
„Авионот е наопаку“
Според аудио-снимка од порталот LiveATC.net, неколку минути пред несреќата контролорите и пилотите разговарале за условите на видливост и одмрзнување на авионот. Контролорот му дал дозвола за полетување од пистата 33.
Речиси две минути подоцна, преку радиоврската се слуша итно предупредување:
„Целиот сообраќај е стопиран!“, по што друг контролор додава:
„Авионот е наопаку. Имаме патнички авион наопаку.“
Истрага во тек
Федералната управа за авијација (FAA) и Националниот одбор за безбедност во сообраќајот (NTSB) најавија дека ќе спроведат детална истрага за причините за несреќата.
Според првичните информации, авионот бил регистриран на корпорација со седиште во Хјустон, а во него се наоѓале тројца членови на екипажот и до пет патници.
Извор: Index Vijesti / CNN / FAA
