Австралиската Qantas Airways, скандинавската SAS и Air New Zealand најавија зголемување на цените на авионските билети, наведувајќи дека причината е наглиот раст на цените на горивото предизвикан од конфликтот на Блискиот Исток.
Цената на млазното гориво, која пред американско-израелските напади врз Иран изнесувала околу 85 до 90 долари по барел, сега се движи меѓу 150 и 200 долари, соопшти новозеландскиот национален превозник. Поради неизвесноста околу конфликтот, компанијата ги суспендираше и финансиските прогнози за 2026 година.
Војната, која ја наруши пловидбата низ Ормускиот теснец, една од најважните светски рути за извоз на нафта, доведе до раст на цените на нафтата, нарушување на глобалните патувања и значително зголемување на цените на билетите на одредени линии. Истовремено, се појавија стравувања дека бројот на патувања би можел значително да се намали.
„Зголемувањата од ваков размер ја прават реакцијата неопходна за да се одржат стабилни и сигурни операции“, изјави портпарол на SAS за Ројтерс, додавајќи дека компанијата направила „привремено прилагодување на цените“.
Lufthansa и Ryanair се заштитиле
Неколку азиски и европски авиокомпании, меѓу кои Lufthansa и Ryanair, се заштитиле од ризикот од раст на цените на нафтата со обезбедување дел од залихите на гориво по фиксни цени.
Finnair, која има обезбедено повеќе од 80 проценти од потребното гориво за првиот квартал, предупреди дека дури и достапноста на гориво може да биде загрозена доколку конфликтот продолжи. Кувајт, кој е еден од главните извозници на млазно гориво за северозападна Европа, веќе е принуден да го намали производството.
Qantas соопшти дека, покрај зголемувањето на цените на меѓународните летови, разгледува и можност за пренасочување на капацитетите кон Европа. Цените на билетите на рутите меѓу Азија и Европа веќе нагло пораснаа поради затворање на дел од воздушниот простор и ограничени капацитети.
Во меѓувреме, Air New Zealand ги зголеми цените на билетите во економската класа: за 10 новозеландски долари на домашните летови, 20 долари на кратките меѓународни линии и 90 долари на долгите линии, со можност за дополнителни корекции ако цената на горивото продолжи да расте.
Горивото е втор најголем трошок
Горивото е вториот најголем трошок за авиокомпаниите по трошоците за работна сила и обично сочинува 20 до 25 проценти од оперативните трошоци.
Покрај поскапувањето на горивото, дополнителен проблем создава и намалениот воздушен простор. Европските авиокомпании веќе мора да ги избегнуваат руските воздушни коридори поради војната во Украина, а новите тензии на Блискиот Исток дополнително ги комплицираат летовите меѓу Европа и Азија.
