Д-р Мартин Елвис, астрофизичар од Харвард, рече дека одредени области на далечната страна на Месечината нудат единствена можност за астрономијата.
Научните истражување на оваа локација може да го подобрат нашето разбирање за Сончевиот систем, можноста за живот надвор од Земјата и еволуцијата на универзумот.
Сепак, тој рече дека не постојат меѓународни правила кои ги штитат овие посебни места, а сегашното „слободно за сите“ може да ги уништи идните можности за истражување, пишува Дејли мејл.
„Иако присуството на луѓе на Месечината ни овозможува да правиме големи нови работи, човечките активности всушност може да ја нарушат самата средина за која одиме таму“, им рече тој на новинарите пред конференцијата на Американското здружение за унапредување на науката (AAAS) во Бостон.
Тој објасни дека иако површината на Месечината е голема, бројот и големината на местата што луѓето сакаат да ги користат „навистина не се толку големи“.
Едно важно место е далечната страна на Месечината, која е најтивката радио локација во Сончевиот систем, објасни тој.
„Сепак, голем број претстојни мисии, научни и ненаучни, ќе таргетираат некои од истите овие локации, заканувајќи се да ја намалат нивната важност за науката“, рече тој.
На прашањето кои комерцијални потфати би можеле да ги загрозат научните истражувања, тој рече: „Мојот вообичаен одговор би бил вселенски туризам“.
Тој додаде дека има интерес од комерцијални компании за екстракција на вода на Месечината, како и за ископ на хелиум-3, кој се користи во некои форми на квантно пресметување.
„Големото прашање е кој одлучува дали место ќе биде за астрономија или за екстракција на вода?“ рече д-р Елвис.
„Што може да спречи некоја земја или компанија да дојде и да каже: ‘Па, не ми е гајле, ова е моето омилено место за копање и вадење вода, па ќе го сторам тоа’“, објасни тој.
Д-р Елвис е копретседавач на Меѓународната астрономска унија, работна група која има цел да ги истражи овие прашања и да им го пренесе вниманието на земјите ширум светот.
Тој рече дека нивната цел е „да почнат да ги убедуваат земјите ширум светот дека треба да се грижат за науката исто како што се грижат за комерцијалните интереси или човечкото истражување“.
Тој предупреди дека мора да се постигне некаква форма на меѓународен договор во следната деценија пред да биде предоцна.
