И покрај нестабилното време и драматичното небо под кое се распламтија молњи и силен дожд, стадионот „Петар Милошевски“ во неделата вечер стана епицентар на незаборавна електронска фешта. Илјадници фанови, вооружени со љубов кон музиката, решителност и добар дух, се собраа да го доживеат живо неговото височество на транс сцената — Армин ван Бјурен.
Со името кое речиси две децении е синоним за епски сетови и емоционални аудио-патувања, Армин уште еднаш докажа зошто е еден од пионерите и највлијателните фигури на глобалната денс сцена. Под отворено небо, на сцена осветлена со пиротехника и спектакуларни визуелни ефекти, тој беше вистински диригент на едно музичко доживување што ги спои генерациите Х, миленијалците и З, сите со иста мисија — да се загубат во ритамот на неговиот State of Trance.
Пред да излезе легендарниот холандски диџеј, сцената ја загреаја Laura van Dam, Cyrilic и Sempre — имиња кои веќе се етаблираат на меѓународната електронска сцена. Нивните сетови беа идеална најава за тоа што следуваше: звучна еуфорија што ја влечеше публиката во колективна транс состојба.
Кулминацијата на вечерта настапи со еден од најемотивните моменти — кога од звучниците одекна легендарната „Love Comes Again“. Илјадници раце во воздух, светло од десетици илјади телефони и пулсирачки визуелни ефекти го направија стадионот сцена од некoj музички утописки сон.
Настанот беше вистинско аудиовизуелно патување, каде што звукот, светлината, енергијата и љубовта кон музиката се споија во едно. Дождот? Далеку од тоа да биде пречка — тој само ја додаде магијата на вечерта. Насликани молњи на хоризонтот беа совршен фон за електронскиот бакнеж кој Битола ќе го памети уште долго.
Навистина, она што го направи Армин во Битола не беше само концерт — беше прашање на заедништво, на вибрација, на она што значи музика кога ги спојува луѓето. И кога на крај, околу три часот наутро, последниот бит стивна, во воздухот сѐ уште се чувствуваше неодминливиот пулс на еден траен музички момент.
Фото: Стефан Рајхл
