Аргентинските власти ја тргнаа ознаката за тајност од повеќе од 1.850 документи за нацистичките активности во земјата по Втората светска војна, кои вклучуваат информации за Адолф Ајхман и Јозеф Менгеле.
На официјалната веб-страница на аргентинската влада е наведено дека документите се собрани во седум досиеја. Материјалите опфаќаат не само активности на нацистички злосторници кои избегале во Јужна Америка, туку и делување на аргентинската војска за време на диктатурата од 1976 до 1983 година.
Се истакнува дека околу 10.000 нацисти побегнале во Аргентина и други јужноамерикански држави по војната. Според истрагата, во тоа им помагале претставници на Ватикан, кои издавале фалсификувани документи, пренесува Спутњик.
Благодарение на обемни работи за реставрација и дигитализација, сега се достапни над 1.850 извештаи и речиси 1.300 доверливи декрети на интернет-страницата на Националниот архив. Овие записи се резултат на истраги спроведени од Дирекцијата за надворешни работи на Федералната полиција, Државниот разузнавачки секретаријат (SIDE) и Националната жандармерија помеѓу педесеттите и осумдесеттите години од минатиот век.
