Пет новинари, вклучувајќи го и главниот уредник на рускиот онлајн медиум База, беа уапсени денеска како дел од истрагата за протекување на полициски информации, јавија руските медиуми.
Тој канал на Телеграм е еден од најпопуларните во Русија, со повеќе од 1,6 милиони следбеници. Основан во 2019 година, познат е по објавување ексклузивни информации, наводно добиени преку добри врски со полицијата.
База утрово објави дека редакцијата била претресена и дека полицијата ја посетила куќата на главниот уредник, Глеб Трифонов, од кого немало никаков одговор оттогаш, како и други новинари кои биле присутни во редакцијата. Според адвокатот, Алексеј Михалчик, полицијата запленила документи и компјутери и уапсила вкупно пет лица, од кои двајца подоцна биле ослободени.
Рускиот истражен комитет, кој се занимава со големи кривични случаи, објави дека започнува истрага за „злоупотреба на положбата на полицајците“, кои наводно „нелегално пренесувале ограничени информации“ кои потоа биле „објавени на еден од каналите на Телеграм“.
Комитетот не го именуваше дотичниот Телеграм канал.
„Како дел од оваа кривична постапка, беа извршени претреси во Московскиот, Краснодарскиот и Краснојарскиот регион, како и во Белгородскиот регион“, изјави Истражниот комитет.
Портпаролката на Министерството за внатрешни работи, Ирина Волк, изјави дека се уапсени неколку полицајци.
