Apple тестира нова верзија на Siri што конечно би можела да разбере и изврши повеќе задачи одеднаш, наместо корисникот да мора да ги дава една по една. Идејата е асистентот да може да одговори на сложени, повеќечекорни барања и поприродно да комуницира со корисникот, нешто што долго време беше слаба точка на Siri.
Оваа промена би била значајна затоа што Siri со години заостанува зад поновите AI асистенти кога станува збор за контекст, флексибилност и разговорен стил. Додека конкуренцијата веќе нуди асистенти што можат да следат покомплексни барања, Apple во последните две години се обидува постепено да ја рестартира Siri преку Apple Intelligence, но и со неколку одложувања на најавените поголеми надградби. Последните поместувања беа направени во 202, кога Apple објави дека дел од AI подобрувањата за Siri се поместени за 2026 година.
Новата верзија на Siri треба да може не само да слуша подолги команди, туку и да ги поврзува во една логична низа, на пример да отвори апликација, да пронајде нешто, да испрати порака и потоа да изврши уште една поврзана задача без дополнително повторување. Тоа би ја приближило Siri до начинот на кој денес функционираат модерните AI четботови и асистенти.
Засега, сепак, сè уште станува збор за тестирање и извештаи од медиуми, а не за официјално пуштена функција од Apple. Токму затоа и најважното прашање не е само дали Siri конечно ќе стане попаметна, туку и дали Apple ќе успее оваа надградба да ја испорача доволно сигурно, откако претходните амбициозни планови за поголема AI Siri веќе еднаш беа одложени.
