Генералниот секретар на Обединетите нации, Антонио Гутереш, изјави дека ниту една воена цел не може да го оправда масовното уништување на инфраструктурата на едно општество, алудирајќи на заканите на американскиот претседател Доналд Трамп кон Иран.
„Ниту една воена цел не оправдува масовно уништување на инфраструктурата на едно општество, ниту намерно нанесување страдање врз цивилното население“, нагласи Гутереш.
Во ист тон реагираше и високиот комесар за човекови права на Обединетите нации, Фолкер Тирк, кој остро ја осуди запалливата реторика поврзана со конфликтот на Блискиот Исток.
„Според меѓународното право, намерното таргетирање на цивили и цивилна инфраструктура претставува воено злосторство. Секој што е одговорен за меѓународни злосторства мора да биде изведен пред лицето на правдата“, истакна Тирк.
Иако во соопштението не беа директно именувани држави, неговите изјави доаѓаат во контекст на зголемените тензии меѓу Соединетите Американски Држави, Иран и Израел.
Тирк дополнително предупреди дека реториката која шири страв и паника меѓу цивилното население е неприфатлива и мора веднаш да престане.
„Осудувам бран на запаллива реторика од сите страни во конфликтот, вклучително и заканите за уништување на цела цивилизација и напади врз цивилна инфраструктура. Тоа е одвратно“, изјави тој.
Тој апелираше до меѓународната заедница итно да преземе чекори за смирување на ситуацијата и заштита на цивилите.
