Ново истражување од Samsung Electronics покажува дека стравовите на потрошувачите за приватноста може да го закочат идниот развој на вештачката интелигенција (AI) во европските домови. Речиси девет од десет Европејци се загрижени за својата приватност и би биле повеќе подготвени да прифатат технологии базирани на AI ако знаеја дека нивните податоци се безбедни, покажа нова анкета.
Истражувањето од Samsung исто така открива дека, покрај загриженоста за приватноста, 62 проценти од Европејците би биле подготвени да користат AI ако подобро ги разберат придобивките што би ги донела во нивниот начин на живот.
Овие податоци доаѓаат во момент кога технолошките компании се тркаат да ја интегрираат AI во своите уреди – како што направи Apple оваа недела со неколку нови ажурирања, вклучувајќи AI во својот паметен часовник за да понуди подобри здравствени податоци.
Собирањето податоци од интернет е едно од најконтроверзните прашања поврзани со AI, при што компании како OpenAI тврдат дека сета содржина на интернет треба да се користи за тренирање на AI модели – што предизвика тужби за авторски права и практики на користење податоци.
Меѓутоа, анкетата исто така покажа дека загриженоста за приватноста е широка – вклучувајќи страв од измами и користење на метаподатоци за идентификација на луѓе.
Покрај тоа, 75 проценти од испитаниците рекле дека управувањето со податоци им е стресно.
Земјата во Европа каде што луѓето биле најмногу под стрес била Шпанија (88%), потоа Грција (87%), а по нив Франција и Италија (двете со 75%).
Стравовите ги одвраќаат потрошувачите
Иако повеќето потрошувачи се загрижени за приватноста на нивните паметни телефони – скоро 50 проценти размислуваат за безбедноста на нивните телефони секој ден – повеќе од една третина никогаш не размислиле за безбедноста на паметните апарати во домот, како што се робот правосмукалки или паметни фрижидери.
Стравот од безбедност спречува 18 проценти од испитаниците да споделуваат податоци меѓу нивните паметни уреди. Ова, според анкетата, ги спречува потрошувачите да го искористат целиот потенцијал на својата технологија.
На Саемот за потрошувачка електроника (CES) во јануари, Samsung Electronics најави дека сака сите домашни уреди да бидат поврзани – на пример, робот правосмукалката автоматски да чисти откако ќе се користи фен за коса.
„Ова истражување укажува на растечки тренд: додека потрошувачите се проактивни кога станува збор за управување со приватноста на нивните смартфони, често ја занемаруваат пошироката екосистема на поврзани уреди“, изјави д-р Сеунгвон Шин, корпоративен потпретседател и шеф на безбедносниот тим во Samsung Electronics.
„Тоа исто така ја рефлектира и двоумливоста да се прифатат целосно искуствата со вештачка интелигенција, најмногу поради неизвесноста околу користењето на податоците.“
Повеќе од 8.000 луѓе беа анкетирани во Обединетото Кралство, Франција, Германија, Италија, Шпанија, Холандија, Хрватска и Грција во април.
