Речиси две третини од Израелците се противат на прекин на огнот со Иран, но јавноста е поделена околу тоа дали Израел треба да го почитува двонеделното примирје или да продолжи со нападите, покажа анкета на Еврејскиот универзитет во Ерусалим. Ова е првата национална анкета спроведена откако САД и Иран се согласија на прекин на огнот минатата недела, со посредство на Пакистан, пренесува Ројтерс.
Прекинот на огнот не го вклучува Хезболах
Примирјето ги запре воздушните напади на САД и Израел врз Иран, но не го заврши паралелниот конфликт меѓу Израел и Хезболах во Либан, кој е поддржан од Иран. Израелската армија продолжи со смртоносното бомбардирање, при што загинаа многу цивили, додека Хезболах продолжи да испукува ракети врз градови во северен Израел. Двете страни не успеаја да постигнат поширок договор за завршување на војната на разговорите во Исламабад за време на викендот.
61% против продолжување на прекинот на огнот
Повеќе од 61 процент од Израелците веруваат дека прекинот на огнот не треба да се прошири на борбите со Хезболах, што беше клучно барање на Иран во преговорите со САД, според анкета спроведена од истражувачи од „Агам Лабс“ на Хебрејскиот универзитет.
На прашањето што треба да направи Израел во врска со Иран, 39 проценти од испитаниците рекле дека треба да продолжи со нападите. 41 процент рекле дека земјата треба да се придржува до прекинот на огнот, додека 19 проценти биле неодлучни.
Анкетата е спроведена на 9 и 10 април на примерок од 1.312 Израелци, со маргина на грешка од 3,2 проценти.
Поддршката за Нетанјаху се намалува
Со неизвесна судбина на примирјето со Иран, Израел се подготвува за долготраен конфликт низ Блискиот Исток, при што израелските претставници заклучуваат дека е невозможно целосно да се елиминираат непријателите во Иран, Либан, Газа и пошироко.
Јавната перцепција за воениот успех во Иран е клучна за премиерот Бенјамин Нетанјаху, кој се соочува со избори најдоцна до октомври, на кои повеќето анкети покажуваат дека ќе ги изгуби. Според анкетата на Хебрејскиот универзитет, рејтингот на Нетанјаху меѓу Израелците опаднал од почетокот на војната со Иран. Во моментов, 34 проценти од Израелците го сакаат за премиер, во споредба со 40 проценти на почетокот на конфликтот.
