Претседателката на Собранието на Србија, Ана Брнабиќ, денеска изјави дека резолуцијата на Европскиот парламент „ја изгубила секоја вредност“ во моментот кога спомнала употреба на „звучен топ“ на протестите од 15 март во Белград.
„Во моментот кога спомнаа непостоечки звучен топ — кој никој не го видел, никој не го чул, а испраќа нечујни звуци и се движи цик-цак — од тој миг резолуцијата стана безвредна и без кредибилитет. Тоа е ниво на комшиски трач, а не документ на сериозна институција“, изјави Брнабиќ на седница на парламентот.
Таа додаде дека, според неа, европските пратеници „наседнале на приказната на опозицијата“ и дека сè што е напишано понатаму во резолуцијата има „истата вредност како и самиот звучен топ – нула“.
Изјавата следеше по настапот на Радомир Лазовиќ од Зелено-левиот фронт, кој рече дека во Европската Унија „никој не сака да се сретне со претседателот Александар Вучиќ“. Брнабиќ му одговори дека Вучиќ се сретнал со „втората најважна личност во ЕУ – претседателот на Европскиот совет“ и дека „толку го избегнуваат“.
„Јас во петок имам средба со високата претставничка за надворешна политика Каја Калас. Ако за вас европратениците Шидер и Пицула се поважни од неа, тоа само покажува како би ја претставувале Србија“, додаде Брнабиќ.
Во продолжение на седницата, таа изрече опомена на пратеничката Татјана Пашиќ од ССП поради, како што рече, навредливи зборови упатени кон граѓаните што престојуваат во Пионирскиот парк. „Не можам да дозволам граѓаните на Србија да ги нарекувате мафијаши и насилници“, рече Брнабиќ.
Во истата сесија, пратеничката на СНС Олја Петровиќ го бранеше предлогот за измени на Законот за единствен избирачки список, истакнувајќи дека Србија „покажува дека продолжува по патот на редот, стабилноста и довербата“, додавајќи дека измените ќе го направат процесот „фер, транспарентен и под дигитална контрола“.
