Сценариото на Расел се издвојува со својата нестандардна структура, користејќи фрагментиран пристап за да ја раскаже приказната. Наративот се движи меѓу минатото и сегашноста, создавајќи слоевит портрет на трите централни ликови: докторот Берт Берансен (Кристијан Бејл), медицинската сестра Валери Воуз (Марго Роби) и адвокатот Харолд Вудман (Џон Дејвид Вашингтон). Ова трио, кое се среќава за време на Првата светска војна, го структуира емоционалното јадро на филмот.
Расел вешто го користи дијалогот за да создаде динамичен ритам, комбинирајќи духовити реплики и филозофски изјави. Со секоја сцена, тој ја гради мистеријата зад заговорот кој се заснова на реални историски настани, а притоа ја истражува и природата на пријателството, лојалноста и идеологијата.
Кристијан Бејл, како и секогаш, ги оправдува високите очекувања на публиката и критиката. Неговата улога како доктор со физички и емотивни лузни од војната е исполнета со суптилност и слоевитост. Бејл на моменти комично ги изразува човечките маани, додека во останатите сцени внесува доза на ранливост.
Марго Роби блеска во улогата на Валери, лик со енигматична аура и уметнички порив. Нејзината харизма ја балансира сериозноста на Бејл, додавајќи весела и анархична енергија во генералниот тон на филмот.
Роберт Де Ниро, со својот авторитетен пристап, ја отелотворува мудроста и интегритетот на генералот Гилберт Диленбек, лик инспириран од реалната историска фигура Смедли Батлер. Неговите сцени се столбовите на филмот, испреплетени со сериозно значење и тежина.
Amsterdam носи клучна порака за нашето време: дека силите кои се обидуваат да манипулираат со општествата преку страв и омраза се повторливи и регенерираат. Филмот го рефлектира опасното влијание на корупцијата и политичките заговори, потсетувајќи нè дека граѓанската свест и солидарноста се неопходни за да се спротивставиме на неправдите.
Расел во ова дело се навраќа на историските настани, а што е уште побитно, поставува и своевидно огледало пред денешното општество. Зад неговиот раскошен стил и комичните моменти се крие суштинска етичка порака: дека мораме да се потсетиме на нашите вредности и да се бориме за правдата како највисок степен на одговорност.
Amsterdam е филм кој ја комбинира актерската виртуозност со значајна порака и (пре)голема амбиција. Иако може да биде предизвик за гледачите со својот фрагментиран наратив, неговата ангажираност и оригиналност прават ова дело да биде значајно. Во време на глобални турбуленции, Amsterdam предупредува и потсетува дека историјата се повторува само ако дозволиме, но и дека храброста, пријателството и пред се хуманоста секогаш се дел од решението.
