Американскиот Сенат го потврди милијардерот и приватен астронаут Џаред Ајзекман за администратор на НАСА, со што овој поддржувач на мисиите кон Марс и поранешен соработник на шефот на SpaceX, Илон Маск, стана 15-тиот директор на американската вселенска агенција.
Гласањето за Ајзекман, кого американскиот претседател Доналд Трамп го повлече, а потоа повторно го номинираше за администратор на НАСА оваа година, заврши со резултат 67 гласа „за“ и 30 „против“.
Тоа се случи две недели откако тој им изјави на сенаторите, на своето второ сослушување, дека НАСА мора да го забрза темпото и во текот на оваа деценија да ја претекне Кина во враќањето на луѓе на Месечината.
