Акциите на американските нафтени компании значително пораснаа во понеделникот, откако американскиот претседател Доналд Трамп најави оживување на венецуелскиот енергетски сектор, по апсењето на претседателот Николас Мадуро за време на викендот, објавува Bloomberg.
Најголем добитник беше Chevron, чии акции пораснаа до 6,3 проценти, што претставува нивен најголем дневен раст од април наваму. Chevron моментално е единствената голема американска нафтена компанија што работи во Венецуела, и тоа врз основа на специјална дозвола од владата на САД.
Раст и кај другите нафтени гиганти
Пораст забележаа и акциите на ConocoPhillips и Exxon Mobil, додека трите најголеми светски компании за нафтени услуги — Halliburton, SLB и Baker Hughes — пораснаа за повеќе од 5 проценти.
Трамп изјави дека американските нафтени компании ќе инвестираат милијарди долари за обнова на уништената енергетска инфраструктура на Венецуела и ќе го вратат нејзиниот нафтен сектор на нивото од минатото.
Chevron во најдобра позиција
Chevron, кој остана присутен во Венецуела и по национализацијата на странските нафтени компании на почетокот на овој век, е во најдобра позиција меѓу глобалните нафтени гиганти да профитира од проширениот американски пристап до најголемите светски резерви на сурова нафта.
Во исто време, Венецуела му должи повеќе од 8 милијарди долари на ConocoPhillips, додека Exxon Mobil побарува околу 1 милијарда долари, според одлуки на меѓународни арбитражи поради одземена имотна сопственост.
Трамп: „Ќе влезат најголемите нафтени компании во светот“
„Ќе ги имаме нашите огромни американски нафтени компании — најголемите во светот — кои ќе влезат, ќе потрошат милијарди долари, ќе ја поправат тешко оштетената нафтена инфраструктура и ќе почнат да ѝ носат приходи на земјата“, изјави Трамп во саботата.
Венецуела произведува тешка сурова нафта, клучна за многу американски рафинерии долж брегот на Мексиканскиот Залив. Поради тоа, акциите на канадските компании кои произведуваат нафта од нафтени песоци — Canadian Natural Resources, Cenovus Energy и Suncor Energy — паднаа во понеделникот.
Обновата ќе трае со години
Целосното закрепнување на венецуелската нафтена индустрија може да трае со години и да чини повеќе од 100 милијарди долари, изјави Франсиско Моналди, директор за енергетска политика за Латинска Америка при Baker Institute на Универзитетот Рајс.
Децении на корупција, недостиг на инвестиции, пожари и кражби ја оставија нафтената инфраструктура во катастрофална состојба, а американските санкции дополнително ја изолираа земјата. Главен купувач на венецуелската нафта досега беше Кина.
Chevron моментално произведува околу 20 проценти од нафтата во Венецуела, врз основа на изземање од санкциите, и ја испорачува суровата нафта до американските рафинерии. Компанијата продолжи со испораките и за време на делумната поморска блокада.
Огромни резерви, минимално учество на пазарот
Иако Венецуела располага со најголемите резерви на нафта во светот, таа учествува со помалку од 1 процент во глобалната понуда.
Акциите на италијанскиот Eni и шпанскиот Repsol, кои исто така работат во Венецуела, пораснаа во раното европско тргување, додека француската компанија Maurel & Prom забележа раст и до 14 проценти.
И покрај американските напади во саботата, венецуелската нафтена инфраструктура вклучувајќи ја луката Хосе, рафинеријата Амуеј и производствените полиња во појасот Ориноко не претрпела штета, велат извори запознаени со состојбата.
