По најновите одлуки на британскиот крал Чарлс III, кој му ја одзеде титулата принц и го исели од неговата резиденција во замокот Виндзор, членови на Конгресниот одбор за надзор во САД го повикаа Ендру да сведочи пред американските власти.
„Кажи ја вистината, дојди доброволно пред Конгресот и раскажи што знаеш. Не само за да им се овозможи правда на жртвите, туку и за вакво нешто никогаш повеќе да не се повтори,“ изјави конгресменот Ража Кришнамурти, член на Демократската партија.
Други членови на одборот, меѓу кои и Сухас Субраманијам, предложија Ендру да сведочи дистанцирано и со присуство на адвокат, нагласувајќи дека неговата соработка е клучна за целосното расветлување на случајот.
Бекингемската палата засега не даде коментар, иако во претходното соопштение изрази „сочувство со жртвите на злоупотреба“, а Ендру продолжува да ги негира обвинувањата.
Британскиот министер за трговија Крис Брајант изјави за BBC дека поранешниот принц треба „да отпатува во САД и лично да одговори на сите прашања“.
Во меѓувреме, британската Независна канцеларија за полициски надзор (IOPC) соопшти дека побарала информации од Метрополитен полицијата за да утврди дали постојат нови елементи кои би можеле да бараат нова истрага.
Метрополитен полицијата соопшти дека уште во 2016 година одлучила да не покрене целосна истрага, сметајќи дека „други јурисдикции се подобро позиционирани“ за да го истражуваат случајот.
Извор: N1info.rs
