Федералните резерви (FED) – централната банка на САД, вечерва по втор пат оваа година ја намалија клучната каматна стапка, со цел да го поддржат економскиот раст и вработувањето, и покрај тоа што инфлацијата и понатаму е зголемена.
Претседателот на FED, Џером Пауел, предупреди дека понатамошни намалувања не се загарантирани, наведувајќи дека одлуката е донесена во услови на недостиг од економски извештаи поради блокадата на сојузната влада, како и поради длабоки поделби меѓу 19-те функционери на банката кои ја кројат монетарната политика.
Намалување за четвртина поен
Со новата одлука, клучната каматна стапка се намалува на околу 3,9%, од претходните 4,1%.
Во текот на 2023 и 2024 година, стапката беше зголемена до околу 5,3% за да се запре највисоката инфлација во последните четири децении.
Минатата година следуваа три последователни намалувања, а ова е второ по ред во 2025 година.
Што значи ова за граѓаните и бизнисите?
Намалувањето на каматните стапки постепено може да ги намали трошоците за кредити – хипотеки, автомобилски и бизнис заеми, како и кредитни картички.
Сепак, Пауел истакна дека економската неизвесност и недостигот од официјални владини податоци го отежнуваат процесот на донесување понатамошни одлуки.
Заради буџетската блокада во Вашингтон, не се објавуваат месечните извештаи за инфлација, вработеност и потрошувачка, кои се клучни индикатори за FED.
