Администрацијата на претседателот Доналд Трамп ги суспендираше сите одлуки за азил и го суспендираше издавањето визи за лица кои патуваат со авганистански пасоши, неколку дена по пукањето во близина на Белата куќа во кое еден член на Националната гарда беше убиен, а друг член беше тешко ранет.
Истрагата продолжува, а осомничениот, 29-годишен авганистански државјанин кој работел со ЦИА за време на војната во Авганистан, сега се соочува со обвиненија, вклучително и убиство од прв степен.
Човекот аплицирал за азил за време на администрацијата на Бајден и му бил одобрен оваа година под Трамп, според организација која помага во преселувањето на Авганистанците кои соработувале со САД.
Администрацијата на Трамп го искористи пукањето за да објави заострување на политиките за легална имиграција, вклучително и замрзнување на влезот од одредени посиромашни земји и преглед на азилот даден на Авганистанци и други мигранти кои веќе се во САД.
Детали за пукањето и обвиненијата
Сара Бекстром, членка на Националната гарда (20), почина по пукањето во среда, додека наредникот Ендру Волф (24), беше хоспитализиран во критична состојба.
Двајцата беа распоредени како дел од мисијата против криминалот во Вашингтон, наредена од Доналд Трамп. Американскиот претседател, исто така, распореди или се обиде да распореди членови на Националната гарда во други градови како дел од неговите планови за масовна депортација, но се соочи со судски предизвици.
Канцеларијата на државниот обвинител Џанина Пиро објави дека Рахманула Лаканвал се соочува и со две обвиненија за напад со намера за убиство. Во интервју за Фокс њуз, таа изјави дека „ќе следат уште многу обвинувања“.
Суспендирање на одлуките за азил и издавање визи
Трамп, пукањето го нарече „терористички напад“ и ја критикуваше администрацијата на Бајден за тоа што дозволи влез на Авганистанци кои соработуваа со американските сили.
Директорот на Службата за државјанство и имиграција на САД, Џозеф Едлоу, објави на Платформа X дека одлуките за азил ќе бидат паузирани „сè додека не бидеме сигурни дека секој странец е испитан и проверен во најголема можна мера“.
Експертите истакнуваат дека САД веќе имаат исклучително ригорозни системи за проверка на азил, а застојот во обработката на апликациите постои со години и се влошил за време на администрацијата на Трамп.
Државниот секретар Марко Рубио објави дека издавањето визи на „сите лица што патуваат со авганистански пасоши“ е исто така суспендирано.
„Тие користат едно насилно лице како изговор за политика што ја планираат долго време, претворајќи ги сопствените разузнавачки неуспеси во оправдување за казнување на цела заедница и ветераните што им служеле“, рече претседателот на #AfghanEvac, Шон Ван Дајвер.
Осомничени – Животот во САД и минатото во Авганистан
Лаканвал, со својата сопруга и петте деца, живеел во Белингам, Вашингтон, рече неговата поранешна газдарица, Кристина Видман.
Соседот Мохамед Шерзад рече дека Лаканвал бил тивок, учтив и зборувал малку англиски. Тој изјавил дека имал тешкотии да најде работа и дека „исчезнал“ пред две недели.
Во текот на летото, тој кратко работел како независен курир за Amazon Flex, соопшти компанијата. Истражителите извршуваат налози за претрес во државата Вашингтон и во други делови од земјата.
Лаканвал влегол во САД во 2021 година преку програмата „Операција „Добредојде на сојузниците“, која ги преселувала Авганистанците по повлекувањето на САД пред нападот на Талибанците.
Тој аплицирал за азил за време на администрацијата на Бајден и добил азил оваа година под администрацијата на Трамп, изјави #AfghanEvac
Според неговиот роднина од источната покраина Хост, кој побарал да остане анонимен, Лаканвал служел во единица на ЦИА во Авганистан позната како „Нулти единици“ во покраината Кандахар.
Почнал како обезбедувач во 2012 година, а подоцна станал водач на тим и GPS специјалист.
