Лидерот на движењето Самоопределување (Vetëvendosje), Албин Курти, го оцени како успех за својата партија исходот на локалните избори на Косово, иако резултатите покажуваат слабеење на поддршката во однос на претходните избори.
Курти истакна дека победата во четири општини во вториот круг — Јужна Митровица, Гњилане, Обилиќ и Косово Поле — е остварена „иако се сите обединија против Самоопределување“.
„Ова е невидена ситуација во политичко-изборната историја на Косово. Затоа овој резултат е успех и за Самоопределување и за граѓаните“, изјави Курти за медиумите, пренесува Koha.
Тој додаде дека сè уште се чекаат конечните резултати од одредени општини, но најави дека вечерта ќе ја помине во славенички собири:
„Најпрво во Косово Поле, потоа во Обилиќ, а потоа и во Јужна Митровица,“ рече Курти.
Во првиот круг на локалните избори, Самоопределување победи во Подујево, Штимље и Каменица. Со четирите општини добиени во вториот круг, движењето сега има вкупно седум градоначалници од 38 општини на Косово.
