Минатата година во Италија е забележана рекордно ниска стапка на наталитет, бидејќи се родени само 370.000 бебиња, објави италијанскиот статистички институт ИСТАТ.
Во соопштението пишува дека населението на Италија се намалило за 37.000 минатата година на 58,93 милиони, продолжувајќи го деценискиот тренд.
Од 2014 година бројот на жители на Италија е намален за речиси 1,9 милиони, објави Ројтерс. Во исто време, просечниот животен век во Италија минатата година се зголеми на 83,4 години, што е речиси пет месеци повеќе од 2023 година, а речиси секој четврти жител имал над 65 години, додека бројот на стогодишници достигна нов максимум од 23.500.
ISTAT наведува дека 191.000 Италијанци се иселиле во странство минатата година, што е најголем број во овој век и за 20 отсто повеќе отколку во 2023 година. Странците сочинувале 9,2 отсто од населението на Италија минатата година, вкупно 5,4 милиони, што е зголемување за 3,2 отсто во споредба со 2023 година.
