По 50-годишна возраст, потребите на телото за одредени хранливи материи се менуваат.
По 50-тата година, на телото му е потребна мала помош. Телото потешко апсорбира одредени хранливи материи, додека во исто време расте потребата за оние кои ја поддржуваат енергијата, имунитетот, густината на коските и здравјето на мозокот.
Недостатокот на клучни витамини во овој период може да го зголеми ризикот од замор, остеопороза, проблеми со варењето и когнитивните способности.
За да се поддржи здравото стареење и да се зачува квалитетот на животот, важно е да се обрне внимание на хранливите материи кои стануваат поважни со возраста. Дерматологот и лекар д-р Мамина Турегано посочува три додатоци во исхраната кои се особено корисни за луѓето над 50 години.
Витамин Д
Витаминот Д игра клучна улога во апсорпцијата на калциум, а неговиот недостаток може да доведе до слабеење на коските, поголем ризик од фрактури и развој на остеопороза, особено кај жените во менопауза и постарите лица. Сепак, како што истакнува д-р Турегано, важноста на овој витамин оди подалеку од само здравјето на коските:
„Витаминот Д е повеќе од само витамин – тоа е хормон кој го поддржува имунитетот, расположението, цврстината на коските, па дури и здравјето на кожата. Ниските нивоа на витамин Д се поврзани со замор, депресија, кршливи коски и ослабен имунитет. Повеќето луѓе, за жал, имаат дефицит – дури и оние кои поминуваат многу време на сонце.
Омега-3 масни киселини
Омега-3 масните киселини се исклучително важни за здравјето на луѓето над 50 години, бидејќи ја поддржуваат работата на многу системи во телото кои стануваат почувствителни со возраста – вклучувајќи го мозокот, срцето и зглобовите.
„Омега-3 киселините се неопходни за здравјето на мозокот, сјајната кожа, функцијата на срцето и намалувањето на воспалението. Ако не јадете мрсна риба како лосос или сардини најмалку двапати неделно, додавањето рибино масло или алги во вашата исхрана може да биде корисно. Омега-3 масните киселини, исто така, ја подобруваат концентрацијата, расположението и можат да помогнат на кожата склона кон акни – делувајќи како антиинфламаторно средство одвнатре.“ вели Турегано
Пробиотици
Со возраста, варењето се забавува и количината на корисни бактерии во цревата се намалува, што може да предизвика надуеност, запек или симптоми слични на синдром на иритабилни црева. Во оваа смисла, пробиотиците помагаат во одржувањето на рамнотежата на цревната флора и подобра апсорпција на хранливи материи.
„Пробиотиците се клуч за добро варење, здрави црева и чиста кожа. Цревната микрофлора влијае на сè, од надуеност до акни, ментална магла и проблеми со кожата. Квалитетниот пробиотик помага да се одржи таа рамнотежа, што значи подобро варење, посилен имунитет и почиста кожа. И не заборавајте ги пребиотиците – тие ги хранат тие добри бактерии за да можат да напредуваат. Затоа, вклучете повеќе пребиотска храна како што се кромид, лук и банани – во вашата исхрана“, заклучува д-р Турегано.
