Илјадници луѓе протестираа во над 200 градови низ Франција во четвртокот, како дел од голем национален штрајк организиран од водечките синдикати, изразувајќи незадоволство од буџетските кратења и барајќи повисоки даноци за богатите.
Во Париз, демонстрантите – вработени, пензионери и студенти – започнаа протестна прошетка од Плас д’Итали попладнето, додека Ајфеловата кула објави дека е затворена поради штрајкот.
Штрајкот е најнов во серијата протести кои започнаа минатиот месец, во време на политичка нестабилност и интензивни буџетски преговори. Синдикатите го повикаа новиот премиер Себастиен Лекорњу да се откаже од мерките предложени од неговиот претходник, кои вклучуваат замрзнување на социјалната помош и рестриктивни мерки на штедење, за кои многумина велат дека ќе ја влошат економската положба на ниско и средно платените работници.
Исто така, синдикатите бараат повисоки даноци за најбогатите граѓани во Франција.
Лекорњу, назначен минатиот месец, сè уште не ги објавил деталите од новиот буџет, ниту пак ја формирал својата влада, што се очекува во наредните денови. Поделеното собрание треба да дебатира за буџетот до крајот на годината.
Пад на претходната влада
Претходната малцинска влада на Франсоа Бајру падна во септември по изгласување на недоверба во парламентот. Тој предложи контроверзен план за заштеда од 44 милијарди евра до 2026 година, делумно преку укинување на два државни празника.
Финансиската состојба на Франција е сериозна – дефицитот во 2024 година достигна 5,8% од БДП, речиси двојно над дозволеното ниво од 3% според ЕУ регулативите. Јавниот долг сега надминува 3,3 трилиони евра, што е околу 114% од економскиот аутпут.
„Три денови на протести без влада и буџет“
Лидерката на CGT синдикатот, Софи Бине, изјави:
„Да, ова е првпат да имаме три дена штрајкови и протести во еден месец – без влада и без буџет. Тоа го покажува нивото на социјален бес.“
На прашањето зошто протестите се одржуваат токму сега, таа одговори:
„Затоа што сега се носат одлуките, и сакаме да бидеме слушнати.“
Намалено учество, но протестите продолжуваат
Министерството за внатрешни работи соопшти дека до пладне надвор од Париз протестирале околу 85.000 луѓе. Националната железничка компанија SNCF објави дека брзите возови функционираат нормално, но некои регионални линии се соочиле со нарушувања. Метрото во Париз работело речиси нормално, но неколку линии имале намален капацитет.
Дел од наставниците и здравствени работници исто така се приклучиле на протестот. Сепак, бројките покажуваат дека одзивот е помал отколку на протестот од 18 септември, кога повеќе од 500.000 луѓе маршираа низ Франција, според полицијата, додека синдикатите тврдат дека биле над 1 милион.
Една недела претходно, движењето „Блокирај сè“ го парализираше сообраќајот и донесе немири низ улиците, со чад, огнови и судири со полицијата.
