Најтешка е состојбата во општина Македонски Брод, каде се води борба со четири активни пожари. Пожарот кај селото Рамне се проширил од кругот на фабриката „Самоков“, а се гори и дабова и мешана шума во околината на селата Црешнево, Локвица, Слатина и Ковче. Критична точка е и Чучер Сандево, каде кај селото Блаце гори ниска вегетација, додека во Шуто Оризари се активни пламени јазици на депонијата кај селото Визбегово.
Во Прилеп сè уште е активен пожарот кај Бешиште, на потегот Бешишки Рид, каде гори мешана шума. Пожари беснеат и на планинскиот масив под Солунска Глава во Чашка, како и кај селото Николич во Дојран, каде гори нискостеблеста шума.
Од вкупните 63 пожари, локализиран е оној кај Кочани, меѓу селата Јастребник и Полаки, а под контрола се пожарите во Делчево, Виница, Крива Паланка и Желино.
Информациите се добиени од регионалните центри за управување со кризи, кои продолжуваат со координација на терен. Од скопскиот центар пристигнати се податоци за интервенциите во ноќниот период од 20:00 до 07:00 часот.
