Искрената почит кон легендарната „барака“ која ја наследил и со која се гордее, театар „Комедија“ сака јавно да ја искаже токму на одбележувањето на 6 децении од изградбата на ова култно место на македонската културна историја.
Почесна гостинка на настанот е легендарната македонска примабалерина Емилија Џипунова, големата дама на македонската театарска и културна историја, директна учесничка во настаните од 19, 20 и 21 февруари 1965 година.
Имено , пред точно 60 години, на 19 февруари 1965 година, во „постземјотресното“ Скопје и во новоизградениот монтажен театар на МНТ, „изместен“ од левиот брег на Вардар на новата локација на градот , на тогашниот булевар „ЈНА“, сега булевар „Климент Охридски“, свечено беше одиграна првата претстава. „Коломба“ на Жан Ануј, комедија во четири чина, во режија на Димитар Ќостаров, во превод на Илија Милчин, сценографија на Тома Владимирски и костимите на Рада Петрова. Главните улоги ги играле: Љупка Џундева (Коломба), Мери Бошкова, Ристо Шишков, Драги Костовски, Чедо Христов.
Следниот ден, на 20 февруари, оперскиот ансамбл на МНТ изведува една од „најголемите“ и најкомпликуваните опери на Ѓузепе Верди, „Набуко“ (диригент: Александар Лековски, сценограф: Бранко Костовски, костимограф: Рада Петрова). Протагонисти биле Анастасија Божикова (Абигајла) и Енцо Серини (Набуко).
Третиот ден, на 21 февруари, настапил и балетскиот ансамбл со канонската „Копелија“ на Лео Делиб (кореографка: Јитка Ивеља, сценограф: Тома Владимирски, костимограф: Василије Поповиќ-Цицо).
Со овие три важни претстави и поважно, со нова и мошне функционална театарска зграда која функционира и ден денес, театарскиот живот во Скопје повторно заживеал, не само професионално, туку и редовно.
Тој објект го наследи Театар „Комедија“ откако МНТ беше преселен во новоизградениот објект, во 2014 година. Првата претстава која „комедијантите“ ја одиграа во тој театар беше комедијата на Оскар Вајлд „Важно е да се викаш Ернест“: на 7 мај 2014 година, во режија на Ирена Стерјовска.
