Бројни истражувања потврдуваат дека ноќната работа го нарушува природниот биолошки часовник, што може да доведе до низа здравствени проблеми, меѓу кои зголемен ризик од кардиоваскуларни заболувања и одредени видови рак. Иако откажувањето од работата често не е опција, постојат стратегии кои можат да помогнат во зачувување на здравјето и подобрување на квалитетот на живот.
Квалитетниот сон како приоритет
Најголемиот предизвик на ноќната работа е нарушениот распоред на спиење. Британскиот национален регулатор за здравје и безбедност при работа (Health and Safety Executive) истакнува дека доследниот распоред на спиење и будење помага во „тренирање“ на биолошкиот часовник. Sleep Foundation препорачува контрола на изложеноста на светлина, со цел да се симулираат ноќни услови и да се поттикне подлабок и поквалитетен сон.
Стратешко планирање на оброците
Ноќната работа може да го наруши и распоредот на исхраната, што директно влијае врз контролата на нивото на гликоза во крвта. Студија на National Institutes of Health покажала дека ограничувањето на оброците на дневните часови може да ги намали наглите скокови на шеќер во крвта и со тоа да го намали ризикот од дијабетес. Се препорачува најобемниот оброк да се консумира во текот на денот, додека навечер треба да се избегнува тешка храна и да се избираат помали и полесни ужини.
Групирајте ги ноќните смени
Стручњаците од University of St. Augustine for Health Sciences советуваат, кога и да е можно, ноќните смени да се групираат. Тие препорачуваат распоредот на спиење прилагоден на ноќната работа да се одржува и за време на слободните денови. На тој начин телото полесно се навикнува на еден стабилен ритам и не мора постојано да се приспособува на промени.
Останете физички активни
Работата ноќе често води кон седечки начин на живот и хроничен замор, што негативно влијае врз метаболизмот, расположението и здравјето на срцето. Редовната физичка активност, како кратки прошетки или вежби за истегнување за време на паузите, може да ја подобри циркулацијата. Исто така, важна е и хидратацијата, доволниот внес на вода ја поддржува концентрацијата, варењето и нивото на енергија. Се препорачува ограничување на кофеинот кон крајот на смената за да не се наруши сонот.
Не го занемарувајте социјалниот живот
Ноќните смени можат да бидат изолирачки и стресни, бидејќи распоредот често не се совпаѓа со семејните и социјалните обврски. Менталното здравје директно влијае врз квалитетот на сонот и општата физичка состојба. Затоа е важно да се одржува контакт со пријателите и семејството во слободното време. Техники за релаксација, како медитација, длабоко дишење или смирувачки рутини пред спиење, исто така можат да помогнат во намалување на стресот.
Извор: Index.hr
