Европската радиодифузна унија објави дека претставници на 38 земји ќе се натпреваруваат на 69. „Песна на Евровизија“, што следната година ќе се одржи во швајцарскиот град Базел.
Благодарение на Немо и песната The Code, следната година „Песна на Евровизија“ ќе се одржи во Швајцарија, од 13 до 17 мај, а за најдобра песна на Стариот континент ќе се борат натпреварувачи од 38 земји, најавија организаторите.
Освен домаќинот Швајцарија, на 69. издание на Евровизија ќе учествуваат и сите земји од „големата петорка“ – Велика Британија, Италија, Германија, Франција и Шпанија.
Ќе се натпреваруваат и Албанија, Австралија, Австрија, Азербејџан, Белгија, Грузија, Грција, Данска, Естонија, Израел, Ирска, Исланд, Ерменија, Кипар, Латвија, Литванија, Малта, Молдавија, Норвешка, Полска, Португалија, Сан Марино, Украина , Финска, Холандија, Чешка и Шведска.
Од земјите од поранешна Југославија ќе учествуваат Србија, Хрватска, Словенија и по двегодишна пауза Црна Гора. Македонија повторно нема да учествува.
