Сообраќајот е еден од најголемите загадувачи на воздухот во светот и затоа неговата трансформација кон одржливост е императив со цел да се ублажат климатските промени.
Електричните возила значително придонесуваат за декарбонизација на сообраќајот, но не смееме да заборавиме на улогата што ја имаат наједноставните еколошки возила како што се велосипедите.
Освен што не испушта штетни гасови и честички, одржливоста на велосипедот се одразува и во тоа што зафаќа помалку простор на патиштата и паркинзите и на тој начин го ублажува сообраќајниот метеж.
Исто така, неговото производство бара помалку ресурси и енергија во споредба со другите возила, додека рециклирањето велосипеди е едноставен и економичен процес.
Конечно, возењето велосипед е тивко, а тоа е особено важно со оглед на тоа што автомобилите се главната причина за урбаното звучно загадување.
Покрај споменатите еколошки придобивки, возењето велосипед придонесува за зачувување на нашето здравје како физичка активност погодна за сите возрасти. Според Светската здравствена организација, возењето велосипед го намалува ризикот од срцеви заболувања, мозочен удар, одредени видови на рак, дијабетес, па дури и смрт.
Поради сето горенаведено, Генералното собрание на Обединетите нации усвои резолуција за интеграција на редовниот велосипедизам во системите за јавен превоз за одржлив развој.
Светскиот ден на велосипедот, кој го славиме на 3 јуни, го привлекува вниманието на придобивките од користењето велосипед – едноставно, достапно, чисто и еколошки одржливо средство за транспорт.
„Одржливиот транспортен систем кој промовира економски раст, ги намалува нееднаквостите, а во исто време ја зајакнува борбата против климатските промени, е клучен за постигнување на целите за одржлив развој“, наведуваат Обединетите нации по повод Светскиот ден на велосипедот.
Некои од земјите со најмногу велосипеди се Холандија, Данска, Германија, Шведска, Норвешка и Финска.
Фото: pexels.com
