Планинарството е многу повеќе од спорт – тоа е начин на живот кој овозможува социјализација, стекнување нови знаења и придонес кон зачувување на екологијата. Во Македонија, овој спорт е сѐ попопуларен, со регистрирани 62 планинарски друштва, од кои дел се активно вклучени во организација на тури и настани. Федерацијата на планинарски спортови на Македонија во моментов работи на модернизирана програма за евиденција на членовите, која ќе овозможи поорганизиран пристап и подобра комуникација меѓу друштвата и федерацијата.
„Планинарството е достапно за сите возрасти, при што најважни се добрата психофизичка состојба, соодветната опрема и желбата за дружба и авантури. Оваа активност нуди незаборавни моменти на планините, каде што луѓето се поврзуваат преку заедничките предизвици и убавини“, изјави за Трн, Зоран Читкушев, претседател на Федерација на планинарски спортови на Македонија.
Светскиот ден на планините
Светскиот ден на планините се одбележува секоја година на 11 декември, со цел подигнување на свеста за значењето на планините за екосистемите и заедниците низ светот. Установен од ОН во 2002 година, овој ден го нагласува значењето на планините за биодиверзитетот, водоснабдувањето и одржливиот развој. Темата за оваа година е „Планини и биодиверзитет,“ со фокус на зачувување на планинските екосистеми како клуч за глобалната одржливост.
Македонските планинари го прославија со подвизи и инспиративни настани
На 8 декември 2024 година, Федерацијата на планинарски спортови на Македонија (ФПСМ), заедно со ПСК „Осогово“ – Кочани, го одбележа Светскиот ден на планините со традиционално планинарско искачување на Пониква. Настанот вклучуваше неколку активности:
- Планинарска акција: Учесниците тргнаа од паркингот на детското одмаралиште на Пониква, прошетаа кружна патека долга 7 км и се искачија на врвот Панаѓур (1669 мнв). На врвот имаа можност да се восхитуваат на прекрасните глетки кон македонските и балканските планини, завршувајќи кај манастирот Св. Василиј со забава и дружење.
- Доделување признанија за заслуги во планинарството и активности за промоција на овој спорт.
- Забавен дел со културни активности.
На 11 декември, Светскиот ден на планините, љубителите на планините се поканети на инспиративна презентација на тема „Искачувањето на Лотце“ од страна на проф. д-р Златко Јаќовски, кој ќе ги сподели своите искуства од освојувањето на четвртиот највисок врв во светот (8516 мнв). Настанот ќе се одржи во КИЦ – Салон 19’19 во Скопје, со бесплатен влез за 140 посетители.
Македонски успех на Балканското првенство во планинска ориентација
Македонските планинари се истакнаа и на меѓународната сцена. На Балканското првенство во планинарска ориентација, кое се одржа на Рајац, Србија, македонскиот тим учествуваше со 14 претставници во сениорски и ветерански категории. Натпреварот вклучуваше ноќна трка, дневна трка и теоретски тестови. Во генералниот пласман, Македонија го освои третото место, веднаш зад Србија и Словенија, што претставува значаен успех за нашиот тим.
Федерацијата на планинарски спортови на Македонија продолжува да инспирира, организира и едуцира, промовирајќи го планинарството како начин на живот кој ги зближува луѓето со природата и меѓусебе.
Планинарите низ светот, вклучително и во Македонија, го одбележуваат овој ден со акции за чистење, пошумување и активности за подигнување на свеста за потребата од заштита на планините. Овој ден е повик до сите да ги почитуваме и зачувуваме планините како наш заеднички ресурс.
