Сепак, прифатлив зимски одмор е сè уште на дофат. Патничката блогерка Ем издвои три града што можат да се посетат со буџет помал од 200 евра. Блогерката ги сподели своите совети во видео со повеќе од 105.000 следбеници, објавува Дејли Меил.
„Ова се моите три омилени градови за прифатливо зимско патување“, навела таа во видеото.
Скриениот бисер на Кавказ: Ереван
Како прва препорака, Ем издвои дестинација што не е меѓу класичните туристички избори, но, како што вели, тоа е еден од нејзините омилени што го посетила оваа година, Ереван во Ерменија.
Таа истакна дека поевтини авионски билети можат да се најдат ако патувањето се комбинира со пократок престој во поголем град, како што е Рим. Според неа, за сместување во центарот на градот платила само 14 евра по лице по ноќ, додека билет за метро чини само 24 центи.
„Градот е опкружен со прекрасни планини и пејзажи, а еднодневните патувања во природа се многу прифатливи и често под снег во текот на зимата“, додаде таа.
Енергичниот град на Полска: Познањ
Втората дестинација на листата е Познањ, град во Полска познат по својот шармантен стар град и богатата гастрономска понуда со прифатливи цени. Ем нагласува дека Познањ нуди многу погодности за патници со ограничен буџет.
„Постојат многу прифатливи активности, како што се Куќата на палмите или одличен спа центар“, рече таа, истакнувајќи дека тричасовен престој во спа центарот чини околу 18 евра.
Додаде дека верува оти Познањ е неправедно запоставен, бидејќи квалитетот на неговата понуда не заостанува зад попопуларните полски градови.
Север од бајките: Талин
Третата препорака води кон северот на Европа, кон балтичкиот регион.
„Во последно време забележав многу евтини авионски билети за оваа дестинација“, рече Ем, осврнувајќи се на Талин, главниот град на Естонија.
Таа го опиша како еден од најубавите и најживописните градови што некогаш ги посетила. Според нејзиното искуство, сместувањето е исто така прифатливо, таа платила 24 евра по лице за Airbnb во срцето на стариот град. Познатиот божиќен панаѓур, кој дополнително привлекува посетители за време на празниците, обезбедува посебна атмосфера за време на зимата.
Патниците се согласуваат со изборот
Видеото собра повеќе од 53.000 лајкови, а многу следбеници ги споделија своите искуства и планови за патување во коментарите.
- Познањ е прекрасен град, фантастична храна и многу љубезни луѓе – напиша еден корисник.
- Дефинитивно го додавам Ереван на листата на дестинации за следната година – додаде друг.
Една следбеничка откри и дека наскоро патува во Естонија:
- Одам во Талин за мојот роденден за нешто повеќе од една недела и ќе бидам таму токму за време на божиќните пазари, едвај чекам.
