Иако здравствените експерти често препорачуваат 10.000 чекори дневно како дел од здравиот начин на живот, научниците откриле дека и 3.000 чекори дневно се доволни за да се забележи забавено когнитивно опаѓање и помали промени во мозокот кај пациентите со ран ризик од Алцхајмер.
Според резултатите објавени во списанието Nature Medicine, когнитивното опаѓање било одложено за три години кај лицата што одеа 3.000–5.000 чекори дневно, и дури за седум години кај оние со 5.000–7.000 чекори.
„Ги охрабруваме повозрасните лица кои се изложени на ризик да направат мали, но постојани промени во своите навики – дури и неколку илјади чекори дневно можат да имаат значаен ефект врз здравјето на мозокот,“ изјави д-р Вај-Јинг Јау, водечки автор на студијата.
Истражувањето опфатило 296 лица на возраст од 50 до 90 години, кои на почетокот немале когнитивни нарушувања. Учесниците користеле педометри за броење чекори, а нивните мозоци биле редовно скенирани со PET-апарати за мерење на белковините амилоид и тау, кои се клучни маркери за Алцхајмеровата болест.
Резултатите покажале дека повисоката физичка активност е поврзана со побавно натрупување на тау белковини и поспоро когнитивно опаѓање. Кај лицата кои биле физички неактивни, деградацијата била забележливо побрза.
Иако точниот механизам сè уште не е целосно познат, научниците укажуваат дека физичката активност го подобрува протокот на крв, ја намалува воспаленоста и го зголемува нивото на одредени хормони и фактори на раст, што позитивно влијае врз мозочните функции.
Според д-р Џулија Дадли од Alzheimer’s Research UK, резултатите даваат јасен показател дека и скромна дневна прошетка може да има заштитен ефект врз мозокот:
„Дури 5.000 чекори дневно се поврзани со побавно натрупување на тау-протеини – еден од главните двигатели на Алцхајмер. Малите промени во начинот на живот можат да направат голема разлика за нашето ментално здравје.“
Науката сè уште бара дефинитивни докази преку клинички испитувања, но ова истражување потврдува дека едноставната физичка активност – како што е одењето – може да биде еден од најефикасните начини да се заштити мозокот во староста.
Извор:The Guardian
