Повеќе од 27.000 работни места ќе бидат отворени во областа на обновливите извори на енергија во регионот на Западен Балкан во следните шест години, од кои најмногу експерти ќе бидат потребни во секторот за соларна енергија, покажа анализата на пазарот на трудот спроведена во Црна Гора, Србија, Северна Македонија, Босна и Херцеговина, Албанија и Косово, пишува РТЦГ.
Oрганизаторите на конференцијата „EduEnergy 2.0: Кон обликување на иднината на транзицијата на обновливите извори на енергија во Западен Балкан“ велат дека за да може регионот адекватно да одговори на „зелената транзиција“, итно се потребни реформи во областа на образованието и школството.
На средбата се очекува да присуствуваат претставници на образовниот сектор од регионот на Западен Балкан – министерствата за образование, енергетика, државните агенции за стручно образование и обука, стопанските комори, работодавачите и училиштата.
„Значаен дел од конференцијата ќе биде посветен на промените на пазарот на трудот кои се очекуваат поради зелената транзиција, потребите на базниот сектор за нови содржини поврзани со обновливите извори на енергија и како младите ја избираат својата кариера и како да ги поттикне да избираат едукативни програми поврзани со енергетиката“, посочува за Радио Црна Гора, директорката на меѓународната организација „Иницијатива за образовни реформи во Југоисточна Европа“ Тина Шариќ.
Анализата на пазарот на труд покажува дека до крајот на 2030 година ќе бидат отворени повеќе од 27.000 работни места во областа на обновливите извори на енергија, од кои најголем број вработени ќе бидат потребни во секторот за соларна енергија.
Во моментов, енергетските сектори во земјите од регионот главно се потпираат на јагленот како извор. Косово, Србија и Босна и Херцеговина се дури меѓу првите 10 земји во светот според процентот на енергија добиена од јаглен. Додека Црна Гора со 39,8 отсто има малку подобра избалансирана енергетска слика. „Конференцијата делумно ќе биде фокусирана на анализа на моменталната ситуација и идентификување на понатамошни потреби“, вели Шариќ.
